Tani 3.5 za meno ya Kiboko zapata mnunuzi

Kampuni ya Ontour Tanzania Limited imenunua kwa Sh30.9 milioni meno ya viboko tani 3.5 yaliyokuwa yakipigwa mnada na Serikali baada ya kukusanywa kwa miaka 14.

Mnada huo umefanyika leo Januari 29, mwaka 2018 jijini Dar es Salaam na kuongozwa na kamati maalumu ya mnada inayoundwa na maofisa wa Wizara ya Fedha na Mamlaka ya Usimamizi wa Wanyamapori Tanzania (Tawa), kuongozwa na Karerema Kwareh kutoka wizara hiyo.

Awali, Kwareh alieleza masharti ya mnada huo, huku sharti namba tano linalimtaka mnunuzi kununua mzigo wote likiibua mjadala kwa baadhi ya wanunuzi wakitaka liondolewe.

Licha ya kupingwa na wanunuzi, Kwareh amesema wazo hilo limechukuliwa na litafanyiwa kazi katika mnada ujao, si mnada wa leo.

Mfanyabiashara wa kwanza alitaka kununua meno hayo kwa Sh25.2 milioni lakini alizidiwa kete na mkurugenzi wa Ontour, Crey Kilasi aliyetoa Sh30.9 milioni.

Kaimu Mkurugenzi wa Tawa,  Mabula Misungwi amesema meno hayo yameuzwa ili thamani yake isiendelee kushuka na hatua hiyo haiwezi kuwa chachu ya kuongezeka kwa ujangili.

"Nyara hizi huwa zina thamani yake na zinavyozidi kukaa huwa thamani inashuka. Meno haya ni yale yanayopatikana kutokana na vifo vya kawaida vya viboko na yale yanayokamatwa kwa majangili," amesema Misungwi.

Amesema meno ya kiboko yana soko kubwa ulaya ambako hutumika kutengenezea urembo na bidhaa nyingine za mapambo.

Akizungumza baada ya kufanikiwa kununua meno hayo, Kilasi amesema atatumia wastani wa miezi sita kutafuta soko.

"Soko lake kubwa ni Japan na China ambapo huyatumia kama mbadala wa meno ya tembo, bei yake inaweza ikafikia Dola 25 za Marekani," amesema Kilasi.

Amesema asilimia 60 ya meno hayo ndio inaweza kuuzika vyema sokoni, huku asilimia 40 yakiwa hayapo katika hali nzuri.

VIDEO: Mbowe - Asema Mtulia Ni Gunia La Misumari

Chama Cha Demokrasia na Maendeleo CHADEMA leo kimeendelea na kampeni zake za ubunge wa jimbo la Kinondoni ambapo Mwenyekiti wa chama hicho Taifa, Freeman Mbowe aliwahutubia wanachama na wafuasi wao huku akimnadi mgombea wao, Salumu Mwalimu.

"Fursa aliyoitoa Mwenyezi mungu ya kuwapa nafasi ya kuchagua mbunge makini ambae atawatetea,  inapaswa muitumie vizuri kuliko kuwa na Mbunge mzigo ambae ni gunia la misumali'' amesema Mbowe

TAZAMA FULL VIDEO HAPA CHINI......USISAHAU KU SUBSCRIBE

Waziri Jaffo atoa agizo kwa Wakurugenzi wa Halmashauri

Waziri wa Nchi Ofisi ya Rais Tamisemi, Selemani Jafo amewaagiza wakuu wa wilaya na wakurugenzi watendaji wa halmashauri (DED) kutunza siri za Serikali.

Jafo ametoa kauli hiyo leo Jumatatu Januari 29,2018 mjini Dodoma alipofungua mafunzo ya uongozi kwa wakuu wa wilaya na wakurugenzi wa mikoa sita.

Mafunzo hayo ni mwendelezo wa ambayo yanatolewa kwa viongozi wa kada hiyo.

Waziri Jafo amesema ujenzi wa Serikali utakuwa mzuri iwapo viongozi hao watakuwa makini na kutunza siri.

"Hivi unakuwaje wewe mkurugenzi au mkuu wa wilaya unapeleka siri za Serikali kwenye mitandao ya kijamii na nyingi unaziona kwenye WhatsApp, inatia aibu sana," amesema Jafo.

Amewataka wakurugenzi kujipambanua na kusimamia miradi ya maendeleo katika kukusanya mapato na kuyatumia vyema na hasa ya ndani.

Jafo amesema tatizo kubwa kwa wakurugenzi ni kutofanya uamuzi kwa haraka.

Ndoa zilizofungishwa bila leseni kubatilishwa

Wakala wa Usajili, Ufilisi na Udhamini nchini RITA, imesema, ndoa zote zilizofungwa bila kuzingatia sheria ya ndoa ikiwemo viongozi wa dini waliofungisha ndoa hizo kutokuwa na Leseni ya kufungisha ndoa huenda zikabatilishwa.

Afisa Usajili Msaidizi wa RITA Jane Barongo, amefafanua kuwa ndoa hizo zitabatilishwa tu endapo itabainika viongozi waliofungisha ndoa hizo hawakuwa na Leseni ya kufungisha ndoa kutoka serikalini.

Barongo ameongeza kuwa kiongozi wa dini atakayebainika kufungisha ndoa bila kuwa na Leseni ya serikali anaweza kuchukuliwa hatua za kisheria kwa mujibu wa sheria ya ndoa ambayo imeipa Rita mamlaka ya kisheria, kusajili ndoa zote zilizofungwa kihalali.

Kwa upande mwingine amesema tayari serikali imewakumbusha viongozi wote wa dini kuhakikisha wanakamilisha taratibu za kukata Leseni ya kufungisha ndoa kabla ya kufungisha ndoa yoyote nchini.

Ang'oa paa la nyumba anayoishi mke wake

Mwanaume mmoja aliyejulikana kwa jina la David Kinyua mkazi wa Gichiche nchini Kenya ameng'oa mabati ya nyumba anayoishi mke wake ambaye anadai amempangisha, akimtuhumu amekaa muda mrefu ndani ya nyumba hiyo kinyume na makubaliano.

Kwenye tukio hilo ambalo limeleta sintofahamu kwa majirani, limeelezwa kwamba Bwana Kinyua ambaye ni mume wa Juliet Karimi alifanya tukio hilo, ili mke wake huyo aweze kuhama na kupisha mpangaji mpya.

“Nilipanga kukarabati nyumba baada ya Julieti kutoka, ili mpangaji akija akute nyumba yenye hali ya kupendeza, lakini amekataa kutoka, na alisaini makubaliano kama mpangaji kufuata utaratibu”, amesema bwana Kinyua.

Upande wa mke wake Bi. Juliet Karimi ambaye ndiye mke alikutwa na balaa hilo, amesema ameshangaa kuona watu wamekuja kutoa paa la nyumba kwenye nyumba anayoishi, na hata haelewi ni kwa namna gani aliishia kuwa mpangaji kwenye nyumba aliyoshiriki kujenga.

'Nilichangia kiuchumi kwenye kujenga nyumba hii, nashangaa haya yanatokea, naomba wanaohusika na masuala ya sheria inisaidie nipate haki yangu”, amesema Julieth ambaye amepangishwa kwenye nyumba aliyoshiriki kujenga yenye vyumba vinne.

Majirani wa wawili hao wamesema wanamfahamu Juliet kama mke wa David, na sio mpangaji kama anavyodaiwa.

Mourinho aweka rekodi nyingine Man Utd

Kocha wa Manchester United Jose Mourinho ametimiza mechi 100 tangu ajiunge na timu huku akiwa na wastani mzuri wa ushindi akiwazidi makocha waliomtangulia akiwemo Sir Alex Ferguson.

Mourinho ambaye alijiunga na United majira ya kiangazi mwaka 2016 amedumu na klabu hiyo kwa msimu mmoja na nusu sasa, na hivi karibuni ameongeza mwaka mmoja kwenye mkataba wake uliokuwa unamalizika 2019.

Katika mechi zake 100 Mourinho amefanikiwa kuiongoza United katika mechi za EPL 62 ambapo ameshinda 34, sare 20 na kufungwa 8. Katika mechi 6 za UEFA Mourinho ameshinda 5 na kupoteza moja.

Kwa upande wa EUROPA Mreno huyo ameshinda mechi 10 akitoka sare mara tatu na kupoteza mbili. Kwa upande wa Kombe la FA amecheza mechi 6 akishinda 5 na kupoteza moja. Kombe la Ligi EFL kocha huyo ameshinda mechi saba na kupoteza mbili.

Kwa upande wa makocha waliomtangulia Ferguson alishinda mechi 48, Moyes ambaye alikomea mechi 51 alishinda 27 pekee huku Louis Van Gaal akishinda mechi 52. Mourinho yupo juu yao akiwa ameshinda jumla ya mechi 62.

Mwijage atoa rai kwa uongozi wa Chuo cha CBE

Waziri wa Viwanda, Biashara na Uwekezaji, Charles Mwijage ameutaka uongozi wa Chuo cha Elimu ya Biashara (CBE) kutoa elimu ya ujasiriamali ili wahitimu waweze kujiajiri.

Akizindua bodi ya CBE jana, Mwijage alisema ujasiriamali liwe somo la lazima ili kukabiliana na tatizo la ukosefu wa ajira.

“Katika zama hizi na tunakokwenda, kuajiriwa itakuwa zilipendwa, hivyo tuwafundishe vijana ili wawe na uwezo wa kuajiriwa na kujiajiri,” alisema Mwijage.

Alifafanua kuwa zamani wahitimu wa vyuo vikuu walitegemea ajira za Serikali lakini sasa hali iko tofauti.

Mwijage alisema chuo hicho kinatakiwa kutoa elimu itakayowasaidia kuwa na mbinu nyingi za ubunifu na kujiajiri.

Mwenyekiti mpya wa bodi, Ester Ishengoma alimhakikishia waziri kuwa bodi hiyo inafuata maelekezo yake kwa lengo la kukiboresha chuo hicho.

Kumbe Ngassa bado anaidai Mbeya City

Kiungo mshambuliaji wa Ndanda FC, Mrisho Ngassa, amesema kuwa amechoka usumbufu wa kuidai klabu yake ya zamani, Mbeya City, mshahara wake wa miezi minne, lakini akasisitiza anaomba fedha zake.

Ngassa alijiunga na Ndanda hivi karibuni katika usajili wa dirisha dogo akitokea Mbeya mara baada ya mkataba wake kumalizika kabla ya kugoma kumuongezea mwingine.

Ngassa alisema kuwa anaidai klabu hiyo shilingi milioni 4.8 alizotakiwa alipwe tangu Desemba, mwaka jana.

Ngassa alisema amefikia hatua ya kuweka wazi madai hayo baada ya hivi karibuni viongozi wa timu hiyo kumwambia watampatia fedha hizo baada ya kulipwa fedha kutoka Azam TV ambao wanadhamini klabu za ligi kuu.

“Nimechoka kuongopewa na viongozi wa Mbeya City, kwani kila wakati nikiwapigia simu kudai malipo yangu ya mshahara ambayo ni shilingi milioni 4.8 wamekuwa hawapokei simu.

“Lakini hata wakipokea wakati mwingine wananipiga Kiswahili, kwa maana ya kunitajia siku nyingine na hivi karibuni walinipa maneno mazuri ya kuwa watanilipa fedha zangu baada ya wao kulipwa na Azam TV.

“Ninajua tayari wamepatiwa fedha hizo, lakini wamejikausha kunilipa fedha hizo ambazo ninadai hadi leo (jana Jumapili), hivyo nimechoshwa nao, naomba wanilipe fedha zangu,” alisema Ngassa aliyewahi kuzichezea Simba, Yanga na Azam FC.


Alipotafutwa jana mchana, Katibu Mkuu wa Mbeya City, Emmanuel Kimbe, alisema hayupo katika nafasi nzuri kuzungumzia suala hilo.

Kampeni za Kinondoni CHADEMA, CCM wazidi kutifuana

Wagombea ubunge jimbo la Kinondoni, Maulid Mtulia (CCM) na Salum Mwalimu (Chadema) wameendelea kujinadi katika mikutano ya kampeni, huku Mtulia akiwashangaa wanaobeza kujiondoa kwake CUF na kujiunga na chama tawala.

Wakati Mtulia akimwaga sera leo Jumatatu Januari 29, 2018 katika uwanja wa Hananasif Kinondoni, Mwalimu alikuwa uwanja wa Mtambani kata ya Mzimuni.

Tangu kuanza kwa kampeni hizo, hoja ya hamahama ya madiwani na wabunge imekuwa ikitawala kutokana na CCM kujikita kuzungumzia sababu za mgombea wake wa Kinondoni, Mtulia kuteuliwa kuwania tena nafasi hiyo, huku Chadema wakitumia kete hiyo kumnadi Mwalimu.

 “Nyalandu (Lazaro-aliyekuwa mbunge Singida Kaskazini) na Godwin Mollel (Siha) nao walihama vyama vyao lakini mimi ndiye nazungumzwa sana na kusema kila chama kimepoteza mbunge wake lakini kuna chama kimeumia kuliko vingine,” amesema na Mtulia.

Amesema, “Wakati nikiwa upinzani sikuwa na namba ya Rais, sasa ninayo mkiwa na matatizo mnaniambia mimi nampigia na mambo yanatekelezwa. Kama kawaida yake yuko kwa ajili ya kuwaletea maendeleo wananchi wote bila ubaguzi.”

Kama ilivyo kwa Mtulia, Dk Mollel naye alikuwa mbunge wa Chadema jimbo la Siha lakini Desemba 14,2017 alihamia CCM na kupitishwa kuwania ubunge huku Nyalandu ambaye alikuwa mbunge kwa tiketi ya CCM, alihamia Chadema.

Akizungumza katika kampeni hizo Mtulia amesema, “Nitakuwa mbunge wa chama dola na ninakwenda kutekeleza ilani ya uchaguzi, mtu yeyote asijaribu kuzuia ilani hii kutekelezwa. Naomba kila mmoja awe mwakilishi wangu wa kuniombea kura. Ukichagua Mtulia umechagua maendeleo.”

Akiomba kura, Mwalimu alisema, “Naahidi kwenda kuwa mbunge wa kuwatumikia wananchi wote si Chadema tu. Siendi kuwa mbunge mnafiki, nitatumia talanta zote na ninaahidi makazi bora Kinondoni, kuna changamoto ya mafuriko.”

Mwalimu amesema, “Naahidi  tutatenga fedha kuondoa mafuriko. Kuna tatizo kubwa la afya, tuna kata nne tu zenye zahanati na kituo kimoja cha afya. Napaswa kusimamia afya. Naenda kusimamia, hakuna bodaboda wala mama ntilie atakayenyanyaswa.”

Sh 1.1 Tirilioni zatolewa kusaidia mapambano dhidi ya Malaria

Shirika la Global Fund limetoa ufadhili wa dola za Marekani 525 milioni sawa na Sh1.1 trilioni kwa Serikali ya Tanzania kwa ajili ya kusaidia mapambano dhidi ya malaria, kifua kikuu na Ukimwi kati ya mwaka 2018 na 2020.

Kati ya fedha hizo, Sh67 bilioni zimetengwa kwa ajili ya kifua kikuu zikihusisha elimu kwa wanajamii, vipimo na dawa  kwa watu ambao watabainika kuwa na ugonjwa huo.

Hatua hiyo inalenga kufikia dhamira ya Serikali ya kuwapa matibabu asilimia 70 ya wagonjwa wote wa kifua kikuu ifikapo mwaka 2020.

Kuhusu malaria Sh320 bilioni zimetengwa kwa ununuzi wa vyandarua, vipimo (mRDTs) na dawa za kutibu ugonjwa huo.

Kwa mapambano dhidi ya Ukimwi zimetengwa Sh769 bilioni kiasi ambacho Waziri wa Afya, Ummy Mwalimu amekitaja kuwa ni kikubwa kuwahi kutolewa na shirika hilo kwa ugonjwa huo.

Akizungumza leo Jumatatu Januari 29,2018 wakati wa utiaji saini makubaliano ya ufadhili huo, Ummy amesema Serikali inatambua na kuthamini kazi inayofanywa na wadau wa masuala ya afya.

Waziri Ummy amemhakikishia mwakilishi wa shirika hilo kuwa, Serikali itaongeza usimamizi katika fedha zinazotolewa na wafadhili kuhakikisha zinatumika kama ilivyokusudiwa.

“Rais mwenyewe ameniambia kuwa fedha hizi ni nyingi, hivyo tufanye kila linalowezekana kuhakikisha zinatumika kama ilivyoelekezwa, nami naahidi nitazifuatilia kuona zinafanya kazi iliyopangwa,” amesema.

Mwakilishi wa Global Fund nchini, Linden Morris amesema shirika hilo litaendelea kusaidia mapambano dhidi ya maradhi hayo.

Morris amesisitiza wasimamizi wa fedha hizo kuhakikisha zinafanya kazi iliyokusudiwa.
 

Pep Guardiola azidisha sifa EPL, sasa kumnasa Laporte

Mlinzi wa Athletico Bilbao, Aymeric Laporte akikabiliana ba Staa wa Barcelona Lionel Messi

Hizi sasa sifa! Ndivyo unavyoweza kusema baada ya klabu ya Manchester City kufikia makubaliano na klabu ya Athletic Bilbao kulipa kiasi cha £57m  takribani shilingi bilioni 158 kwaajili ya kukamilisha usajili wa mlinzi wa kati wa klabu hiyo Aymeric Laporte.

Kiasi hicho ambacho Man City inakilipa kwa Bilbao ni kwa ajili ya kuvunja mkataba wa mchezaji huyo (Buy Out Clause) na Pep Guardiola ameonekana kuhitaji huduma ya beki huyo ili kuimarisha safu yake ya ulinzi.

Ripoti nchini England zinasema kuwa Laporte raia wa Ufaransa mwenye miaka 23 huenda kesho akakamilisha vipimo na kusaini mkataba na vinara hao wa ligi kuu soka nchini humo.

Endapo Laporte atatua ndani ya Man City atakuwa ndiye mchezaji ghali zaidi akivunja rekodi ya usajili ya klabu hiyo inayoshikiliwa na kiungo Kevin de Bruyne ambaye alisajiliwa kwa dau la £55m mwaka 2015 akitokea VfL Wolfsburg ya Ujerumani.

Laporte huenda akaungana na walinzi wengine ghali duniani ambao ni John Stones na Kyle Walker waliosajiliwa ndani ya uongozi wa Pep Guardiola.

Baada ya vichapo Mbao FC kujiuliza kwa Kariakoo ya Lindi

Baada ya kuchezea vichapo viwili mfululizo katika Ligi Kuu kwa Mbao FC, sasa imepanga kufanya kweli katika mchezo wao wa kombe la FA dhidi ya Kariakoo Lindi utakaopigwa Jumatano hii.

Wababe hao wa vigogo wa Ligi Kuu Simba na Yanga, walichezea vipondo mechi zao mbili bila majibu,ambapo walianza kulizwa na Stand United bao 1-0 wakiwa nyumbani, kisha kuchapwa tena na Ruvu Shooting mabao 2-0 ugenini.

Nahodha kikosi hicho,Yusuph Ndikumana alisema wanawafuata Kariakoo kwa lengo moja tu kusaka ushindi ili kusonga mbele kwenye mashindano hayo.

Alisema makosa waliyoyafanya katika mechi zao za Ligi Kuu hawatarajii yajirudie na kwamba wanahitaji kutwaa ubingwa huo ambao waliukosa msimu uliopita.

“Tunaenda kwa lengo moja la kusaka ushindi ili kusonga mbele,ni mchezo mgumu na muhimu sana kwetu,makosa tuliyoyafanya hatutarajii kuyarudia kwenye FA”alisema Ndikumana.

Beki huyo aliongeza kuwa Kariakoo hawaijui kiundani, hivyo watakuwa makini kuzuia aina yoyote ya mashambulizi langoni mwao kuhakikisha hawapiti kirahisi ili kufikia malengo yao.

“Hatuwajui Kariakoo, kwahiyo tutakuwa na tahadhari sana nao kuwakabili, tunalenga sana kutwaa ubingwa msimu huu baada ya kuukosa msimu uliopita”alisema nahodha huyo Mrundi.

Mbao ilifanikiwa kufika fainali ya mashindano hayo katika msimu uliopita na kufungwa mabao 2-1 dhidi ya Simba, ambayo tayari imeshayaaga mashindano hayo.

Wakazi Wa Dar Wamiminika Ofisi za Mkuu Wa Mkoa Kujua Hatima Yao

Zaidi ya Wananchi  elfu tatu leo wamejitokeza ikiwa ni Siku ya kwanza ya Utatuzi wa Malalamiko ya Kisheria kwa Wananchi waliodhulumiwa chini ya Wanasheria Magwiji 160 ikiwa ni Mkakati wa Mkuu wa Mkoa wa Dar es salaam Paul Makonda kusaidia wanyonge waliodhulumiwa Mali zao kupata haki pasipo kuvunja sheria.

Wananchi hao wametaabika kwa muda mrefu baada ya kudhulumiwa Mali zao Walizochuma kwa Tabu na sasa kupitia huduma ya Masada wa kisheria uliotangazwa na RC Makonda wanaamni watarejeshewa haki yao.

Makonda amesema idadi kubwa ya wananchi waliojitokeza leo inatoa picha kamili Kuwa wapo viongozi wasiotekeleza vyema majukumu yao ya kiofisi kwenye idara zao ambapo ameahidi kuwawajibisha.

Aidha  Makonda amesema kilichomgusa kuandaa Wiki ya msaada wa kisheria ni baada kubaini uwepo wa wananchi wanaonyanyasiki na hata kufikia hatua ya kufa kwa presha au kupooza miili baada ya kudhulumiwa na watu wenye pesa au wanaotumia uelewa wa sheria kukandamiza wanyonge.

Kutokana na idadi kuwa kubwa wanaoendelea kujitokeza Makonda anaongeza wanasheria wengi zaidi ili kuhakikisha Kila anaefika na kupata namba anahudumiwa ipasavyo ambapo amewaomba wanasheria kuhakikisha wanawasikiliza wananchi kwa umakini na kuchambua nyaraka kwa ufasaha na wasitoe hukumu.

Makonda amesema katika zoezi hili limehusisha Wanasheria wabobezi, Wataalamu wa kutambua nyaraka zilizogushiwa, watendaji wa Ardhi na watumishi wa Mahakama ambao wapo kwaajili ya kuwahudumia Wananchi.

Pia Makonda amesema baada ya kupokea ripoti kamili ya kesi zote atasimama kuhakikisha Hakuna mnyonge anabaki akinyanyasika.

Zoezi la kusikiliza wananchi waliodhulumiwa Mali zao ikiwemo Nyumba, Viwanja, Magari, Mirathi na Kazi litaendelea hadi siku ya Ijumaa ya February 2.

Nao wananchi waliojitokeza wamemshukuru  Makonda kwa kutambua Tabu wanazozipata baada ya kudhulumiwa na wajanja ambapo wengine wamesema wamepoteza Waume, Wake zao na wengine kupata magonjwa baada ya kudhulumiwa na wametaabika Muda mrefu kutafuta haki pasipo kufanikiwa lakini kupitia utendaji kazi makini wa  Makonda wanaamni haki inapatikana.