Monday, 4 December 2017

Nafasi za kazi leo Dec 4

26 Job Opportunities at Tanesco Tanzania

Job Opportunity at Tigo Tanzania, Regional Distribution Coordinator

Job Opportunity at EGPAF, Project Coordinator

Job Opportunity at EGPAF, Health Information System (HIS) Officer

Job Opportunity at EGPAF, Technical Officer TB services

Sales Jobs at METL (2 Vacancies)

Nafasi zingine Bonyeza www.ajirayako.co.tz

Kujiengua kwa Mtulia haujakishtua chama cha CUF

Uamuzi wa Maulid Mtulia kujivua ubunge na uanachama haujakishtua chama chake cha CUF, badala yake kimesema bado wengine wawili ambao kingependa waondoke haraka.

Hilo lilisemwa jana na katibu mkuu wa CUF, Maalim Seif Sharif Hamad ambaye anaongoza upande mmojapo kati ya mbili zinazokinzana. Upande mwingine unaongozwa na Profesa Ibrahim Lipumba.

Lakini upande wa Profesa Lipumba umesema unatafakari uamuzi huo wa Mtulia ambaye anakuwa mbunge wa pili kujivua uanachama.

Wakati sakata hilo la kuhamahama vyama likipamba moto, aliyekuwa naibu waziri wa Kazi, Ajira na Maendeleo ya Vijana wa Serikali ya Awamu ya Nne, Makongoro Mahanga amesema amekuwa akifuatwa na watu tofauti ambao “pengine hawafahamiani” wakimshawishi arudi CCM, lakini amesema kamwe hataondoka Chadema.

Hamahama ya wanasiasa imesababisha baadhi ya kata kufanya uchaguzi mdogo kujaza nafasi zilizoachwa wazi na madiwani waliohamia CCM, huku jimbo moja likitarajiwa kupata mbunge mpya Januari 13 na sasa Kinondoni imekuwa wazi baada ya Mtulia kujiuzulu juzi.

Hayo yakielezwa, mwenyekiti wa CUF anayetambuliwa na Ofisi ya Msajili wa Vyama vya Siasa, Profesa Lipumba amesema wanatafakari uamuzi wa Mtulia kujivua ubunge ghafla.

Hata hivyo, naibu katibu mkuu wa CUF (Zanzibar), Nassor Ahmed Mazrui aliliambia gazeti hili kwa njia ya simu jana kuwa, Mtulia ni mmoja wa wabunge watatu wanaomuunga mkono Profesa Lipumba.

“Hatukutarajia kama Mtulia ataondoka wakati huu, bali tulijua ataendelea kudumu. Lakini kama ameondoka ni faraja kwetu kwa sababu katika mipango yetu tulishamuondoa,” alisema Mazrui.

“Tunawaombea dua wale wawili waliobaki waondoke hata leo kwa sababu kuendelea kukaa kwao ndani ya CUF ni kukidhoofisha chama hiki.”

Mazrui aliwataka wabunge kutoshangaa endapo wenzao hao watatangaza kujiuzulu nafasi zao akidai kuna mipango inaendelea kupangwa ili kufanikisha mchakato huo.

“Narudia tena na waondoke, tena waondoke haraka. Ninawahakikishia wana CUF kuwa chama hiki kipo imara na wasiwe na hofu,” alisema Mazrui.

Alisema CUF ni taasisi imara na kati ya wabunge 40, watatu alidai wamekuwa wakikivuruga chama hicho kwa kushirikiana na Profesa Lipumba.

Akizungumzia kuondoka kwa Mtulia, alisema wakati mwingine akifa mgonjwa uliyemuuguza muda mrefu unamshukuru Mungu.

“Tunamshukuru Mungu maana tumeuguza vya kutosha. Haikuwa bahati yetu,” alisema.

Naye Profesa Lipumba alisema kamati ya utendaji ya CUF itakutana kutafakari.

“Siwezi kusema lolote kwa sasa. Bado natafakari kwa sababu nimemtafuta mhusika (Mtulia) sijampata hadi sasa. Kwa kweli imekuwa ghafla na hakuwahi kunidokezea kwamba atahama,” alisema.

“Kamati ya utendaji itakutana kujadiliana kuhusu suala hili. Naomba uwe mvumilivu tunahitaji kujua nini chanzo cha yeye kuondoka, kisha tutatoa taarifa kwa vyombo vya habari.”

Hamidu Bobali, mwenyekiti wa Jumuiya Vijana wa CUF (JuviCUF), ambayo Mtulia alikuwa naibu katibu mkuu alisema kitendo kilichofanywa na mbunge huyo kimemshushia hadhi.

Alimtaka Mtulia akumbuke namna ambavyo watu walipambana hadi akaibuka kidedea katika ubunge wakati wa Uchaguzi Mkuu mwaka 2015.

“Tulianza kumpigania ndani ya CUF, hivi mliweza kufikiri kama Mtulia angemshinda (Abdul) Kambaya? Kambaya alikuwa na nguvu na kila sifa, lakini JuviCUF tulimpigania kijana mwenzetu ili ateuliwe kwenye kura ya maoni, ili agombee jimbo lakini matokeo ndiyo haya,” alisema Bobali ambaye pia ni mbunge wa Mchinga mkoani Lindi.

Barua ya kujiuzulu Mtulia

Katika taarifa yake ya kujiuzulu, Mtulia alitoa sababu zinazolingana na wanachama wengine waliohamia CCM, akisema chama hicho kimefanya mambo mengi ambayo wapinzani waliyaahidi.

“Kwa kuwa nia yangu ni kuwatumikia wananchi, sioni sababu ya kuendelea kuwa upinzani na badala yake nimeona ni vyema niungane na juhudi za Serikali kwa kumuunga mkono Rais Magufuli katika kuwaletea wananchi maendeleo na kukabiliana na kero mbalimbali,” alisema.

Aliwashukuru wananchi wa Kinondoni kwa kumpa dhamana ya ubunge katika Uchaguzi Mkuu uliopita na kuwaahidi kuwa yupo tayari kuendelea kushirikiana nao. Hadi jana, katibu wa Bunge, Stephen Kagaigai alikuwa hajapokea barua ya Mtulia kuhusu kujiuzulu kwake.

Dk Mahanga adai CCM inamsaka

Katika hatua nyingine, Dk Mahanga ambaye aliwahi kuwa naibu waziri kwa takriban miaka kumi, amedai kufuatwa na watu tofauti wanaomshawishi arejea CCM.

Dk Mahanga ambaye alihamia Chadema Agosti 2, 2015, baada ya kushindwa katika kura za maoni ya kuwania ubunge wa Segerea, alisema alijitoa CCM kwa sababu utaratibu uliotumika haukuwa sahihi na uligubikwa na vitendo vya rushwa na njama zilizofanywa na viongozi wa kitaifa kuhakikisha anaondolewa, lakini sasa wanamfuata.

“Siwezi kuwataja ni akina nani, wala idadi yao na mara ngapi wamekuja. Ila umma ujue wameshakuja mara kadhaa kunishawishi na sidhani kama wanajuana kuwa wanatumwa na kwenda kwa mtu mmoja,” alisema Dk Mahanga.

“Nawaambia hivi sirudi huko. Huwa ninaishi kwa ninachokiamini na hakuna kinachoweza kunishawishi kubadili imani na dhamira yangu ya Agosti 2 mwaka 2015.”

Kabla ya kuzungumza na gazeti hili, Dk Mahanga aliandika katika ukurasa wake wa Facebook kuhusu harakati hizo.

“Imani yangu, utu wangu na msimamo wangu huwa hauna bei. Kamwe sitorudi CCM acheni kuhangaika,” aliandika Dk Mahanga katika ukurasa huo.

Mwanasiasa huyo alijifananisha na kiongozi wa upinzani nchini Kenya, Raila Odinga akisema hatabadili msimamo.

Pia alishangaa baadhi ya watu wanaotoka upinzani kwenda CCM wakidai kuridhishwa na utendaji kazi wa Rais Magufuli na kuunga mkono jitihada za Serikali wakati hali ya maisha ni ngumu kwa Watanzania.

Mawaziri, wakuu wa Wilaya wa awamu zilizopita kidedea ndani ya Uchaguzi CCM

Wanachama waliokuwa mawaziri na wakuu wa wilaya katika uongozi wa Serikali za awamu zilizopita, wameibuka kidedea kwenye uchaguzi ndani ya CCM unaoendelea kote nchini.

Mawaziri wawili wa zamani, Kate Kamba na Anthony Diallo wameibuka kuwa wenyeviti wa mikoa ya Dar es Salaam na Mwanza.

Kamba aliwahi kuwa naibu waziri wa Maendeleo ya Jamii, Wanawake na Watoto na naibu waziri wa Viwanda na Biashara kati ya mwaka 1994 na 1995. Pia, aliwahi kuwa mbunge wa Afrika Mashariki.

Kwa nyakati tofauti kati ya mwaka 2000 na 2008, Diallo aliwahi kuwa naibu waziri wa Maji na Mifugo, naibu waziri wa Viwanda na Biashara; waziri wa Maendeleo ya Mifugo na waziri wa Maliasili na Utalii.

Juzi, msimamizi wa uchaguzi wa CCM mkoani Dar es Salaam, William Lukuvi alimtangaza Kamba kuwa mshindi baada ya kupata kura 443. Wapinzani wake, Brigedia Jenerali mstaafu Ryakitimbo Magige alipata kura 22 na Malima Bunara kura 12.

Kamba alisema chama hicho kina mizizi katika jumuiya zake na kwamba kuna wakulima na wafanyakazi ambao hawana chama, hivyo viongozi washirikiane ili kupata ushindi katika Uchaguzi Mkuu wa mwaka 2020.

Diallo, aliyekuwa akitetea nafasi hiyo, aliibuka mshindi kwa kupata kura 555 kati ya 1,086 zilizopigwa akiwabwaga wapinzani wake watatu, akiwamo aliyekuwa mkuu wa Mkoa wa Kilimanjaro, Said Mecky Sadiki aliyepata kura 520.

Wagombea wengine waliowania kiti hicho ni Enock Masele aliyepata kura tano na Richard Lukambula aliyepata kura sita.

Akizungumza baada ya kutangazwa mshindi juzi, Diallo alisema: “Niwapongeze wote mlionipa ushindi huu hata wale ambao kura zao hawakunipaa nawashukuru pia. Zaidi natamani tuwe wamoja ili kuendelea kukipa ushindi chama chetu kizidi kushika dola.”

Sadiki alisisitiza kuendeleza mshikamano na kumuunga mkono aliyeshinda, huku Lukambula akiwaomba msamaha wajumbe kwamba huenda aliwakosea wakati wa kampeni ndiyo maana wakaamua kumpa kura chache. Hata hivyo aliahidi kumpa ushirikiano kiongozi aliyechaguliwa.

Juzi, Diallo alieleza kukerwa na kitendo cha maofisa wa Taasisi ya Kuzuia na Kupambana na Rushwa (Takukuru) kusimamisha gari lake na kulipekua alipokuwa kwenye kampeni wilayani Ukerewe.

Akizungumza wakati wa kuomba kura, alisema amesikitishwa na kutofurahishwa na kitendo cha maofisa hao.

Mkoani Singida, waliokuwa wakuu wa wilaya katika Serikali ya Awamu ya Nne walishinda nafasi za uongozi katika Jumuiya ya Wazazi ya CCM.

Wakuu hao wa zamani ni Erasto Sima, ambaye alishinda nafasi ya mwenyekiti wa mkoa wa jumuiya hiyo, wakati Francis Mtinga alichaguliwa kuwa mjumbe wa mkutano mkuu CCM na Baraza Kuu Wazazi. Mtinga aliwahi kuwa mkuu wa Wilaya ya Chemba mkoani Dodoma.

Mkoani Rukwa, Rainer Lukara alichaguliwa kuwa mwenyekiti wa CCM wa mkoa akimbwaga Hipolitus Matete aliyekuwa akitetea nafasi hiyo.

Mbunge wa Mtera, Livingstone Lusinde aliyesimamia uchaguzi huo alimtangaza Lukara aliyepata kura 357 kuwa mshindi katika nafasi ya mwenyekiti akimbwaga Matete aliyepata kura 148, huku aliyekuwa mkuu wa wilaya, Kanali John Mzurikwao akipata kura tisa na Victor Chang’a kura moja.

Lukara aliwataka wagombea kuvunja kambi, akisema katika uongozi wake atahakikisha jumuiya za CCM zinakuwa imara.

Alisema atahakikisha rasilimali zilizopo ndani ya CCM zinawanufaisha wanachama wote, wakiwamo mabalozi wa nyumba 10 ambao wamekuwa wakifanya kazi za kukijenga chama hicho kuanzia ngazi ya matawi na shina.

Mkoani Tanga, Henry Shekifu alitetea nafasi ya uenyekiti wa mkoa aliyoshikilia kwa miaka mitano. Katika uchaguzi huo uliosimamiwa na mjumbe wa Halmashauri Kuu ya CCM, Martine Shigella juzi, ulimalizika saa 9:00 usiku baada ya wajumbe kurudia kupiga kura kwa nafasi ya mwenyekiti.

Shekifu alishinda kwa kupata kura 609 kati ya 1,163 zilizopigwa, akimshinda Balozi Abdi Mshangama aliyepata kura 530 .

Katika awamu ya kwanza, Balozi Mshangama alipata kura 528 ambazo hazikuvuka nusu ya kura zote.

Mgombea mwingine aliyewania nafasi hiyo ni mbunge wa zamani wa Pangani, Rished Abdallah aliyepata kura 133 hivyo kulazimika kuwaachia Mshangama na Shekifu kuchuana katika duru la pili.

Katika mkutano huo, aliyekuwa mgombea ubunge wa Bumbuli katika Uchaguzi Mkuu wa 2015 kupitia Chadema, David Chanyeghea alitangaza kuhamia CCM.

Imeandikwa na Pamela Chilongola, Ngollo John, Johari Shani, Mussa Mwangoka, Gasper Andrew na Burhani Yakub

Mpango wa kutengeneza fedha mpya watangazwa

Rais wa Venezuela Nicolas Maduro ametangaza mpango wa kutengeneza fedha mpya ya nchi hiyo katika kujaribu kuunusuru uchumi wa nchi hiyo.

Amesema fedha hiyo iitwayo Petro itaimarishwa na utajiri wa Venezuela utokanao na mafuta, gesi, pamoja na dhahabu.

Uchumi wa Venezuela umedorora mno kutokana na kushuka kwa mapato ya mafuta pamoja na kuporomoka kwa thamani ya fedha yake ya sasa ya bolivar.

Bunduki ya Nassari yachunguzwa

Wakati mbunge wa Arumeru Mashariki (Chadema), Joshua Nassari akilihusisha tukio la kuvamiwa nyumbani kwake na watu wasiojulikana na masuala ya kisiasa, polisi inashikilia bunduki ya mwanasiasa huyo kwa uchunguzi.

Polisi mkoani Arusha imesema imeanza uchunguzi wa kina wa kuwasaka washukiwa, huku ikichunguza silaha ya Nassari aina ya shotgun, ikisema tukio hilo lina utata kutokana na mazingira lilivyotokea.

Kamanda wa polisi wa mkoa, Charles Mkumbo aliliambia gazeti hili kuwa wameanza uchunguzi wa kina ili kubaini endapo kulikuwa na tukio au la.

“Tunaifanyia uchunguzi bunduki yake, tunataka kujiridhisha endapo kulikuwa na tukio au la,” alisema Mkumbo.

Hata hivyo, kamanda huyo alisema msako unaendelea ili kuwabaini washukiwa na kwamba hawajapata maganda ya risasi zinazodaiwa kutumika katika uvamizi huo.

Juzi Nassari aliwaambia waandishi wa habari kuwa nusu saa baada ya kuwasili nyumbani kwake alisikia hali isiyo ya kawaida ndani ya uzio wa nyumba na baadaye kulisikika milio ya risasi. Alisema mbwa wake aliyekuwa akibweka alinyamaza, hali iliyomfanya achukue silaha yake kujihami.

“Nilipiga risasi tano, kisha kukawa kimya nikaenda kuwaamsha vijana wanaonisaidia hapa nyumbani kuwaeleza tukio lililotokea kisha nikaondoka.”

Alisema waliofanya tukio hilo hawakujua kama ana silaha kwa sababu mwaka 2014 wakati wa uchaguzi wa Serikali za mitaa, bastola yake ilichukuliwa na polisi na hadi leo haijarudishwa, hivyo kuwa na silaha nyingine kulimsaidia kujibu mapigo.

Katika tukio hilo, Nassari alisema aliwajibu watu hao kwa kupiga risasi tano hewani huku wenyewe wakipiga 12 na moja ilimpata mbwa wake ambaye alimzika juzi katika maeneo ya nyumba anayoishi.

Hivi karibuni mbunge huyo aliwasilisha makao makuu ya Takukuru ushahidi wa CD aliodai kuwa unawahusisha madiwani wa Chadema mkoani Arusha kushawishiwa kuhamia chama tawala.

Aliyekuwa Waziri Mkuu Misri hajulikani alipo

Familia ya aliyekuwa Waziri Mkuu wa Misri, Ahmed Shafiq imesema haina taarifa wapi aliko ndugu yao baada ya kutangaza ana azma ya kuwania urais katika uchaguzi mkuu mwakani.

Shafiq ambaye ni kamanda wa zamani wa jeshi la anga la Misri na waziri mkuu katika utawala wa Hosni Mubarak, anaonekana kuwa mgombea mwenye nguvu ya kuchuana na Rais Abdel Fattah al Sisi ambaye anatarajiwa kugombea muhula wa pili katika uchaguzi huo.

Familia ya Shafiq aliyerejea mjini Cairo jana kwa kutumia ndege binafsi imesema haijui lolote kuhusu hatima yake.

Wakili wake pia amesema hajawasiliana naye, huku Wizara ya Mambo ya Nje ya Misri ikisema haihusiki na suala la Shafiq.

Ripoti zinasema Shafiq aliwasili Misri jana jioni na alionekana mjini Cairo.

Maofisa wa Falme za Kiarabu wamethibitisha kuwa Shafiq aliondoka nchini humo.